حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

زمانہ غرقِ صد حیرت ہے سن کر داستاں میری

غزل| محمد حسین فطرتؔ انتخاب| بزم سخن

زمانہ غرقِ صد حیرت ہے سن کر داستاں میری
گری بجلی تو جھوم اٹھی ہے شاخِ آشیاں میری
یہ میری خوش نصیبی ہے کہ اک قاتل کی صورت میں
تلاش و جستجو میں ہے حیاتِ جاوداں میری
اسی امید پر میں آشیاں تعمیر کرتا ہوں
کرے گی حوصلہ افزائیاں برقِ تپاں میری
ثبوتِ زندگی اس کے سوا کیا اور دوں تم کو
عزائم ہیں مرے پختہ امیدیں ہیں جواں میری
مری خوشبو مرا رنگ اور رعنائی ہے لا فانی
مٹا سکتا نہیں کوئی بہارِ بے خزاں میری
نہیں میری فلک پیمائیوں کی انتہا کوئی
بلندی دیکھ کر حیراں ہیں ماہ و کہکشاں میری
چمن کے لالہ و گل پر فقط گُلچیں کا قبضہ ہے
کہوں کس منہ آخر ہے بہارِ گلستاں میری
بفیضِ انقلابِ عصر گونگے ہوگئے وہ خود
جو ناداں چاہتے تھے بند ہوجائے زباں میری
یہی اک آشیاں جلنے پہ قصہ ختم کب ہوگا
کرے گی ہمت افزائی سدا برقِ تپاں میری

مری تاریخِ عظمت پر نہ پردہ پڑ سکا فطرتؔ
جھلکتی ہے حقیقت داستاں در داستاں میری

پچھلا کلام | اگلا کلام

شاعر کا مزید کلام