اُن حسینوں کی نگاہیں فتنہ ساماں ہوگئیں

بجلیاں بن کر گریں اور اور دل میں پنہاں ہوگئیں

دل سے آنکھوں تک تھے جلوے آہ کیا کیا وصل میں

بستیاں یہ سب سحر ہوتے ہی ویراں ہوگئیں

نزع میں اک دوسری دنیا ہوئی پیشِ نظر

مشکلیں ہم تو سمجھتے تھے کہ آساں ہوگئیں

ہے ہر اک موجِ ہوا میں زلف کا سا پیچ و تاب

اس تکلف سے تری زلفیں پریشاں ہوگئیں

اُس سے اندازہ مرے دل کے تلاطم کا کرو

چار بوندیں آنکھ سے ٹپکی تھیں طوفاں ہوگئیں

اک زمانہ تھا کہ ہم تھے دل تھا اور شوقِ وصال

اب وہ باتیں ہم نشیں خوابِ پریشاں ہوگئیں

تیری آنکھوں کا تصور محشرِ نظارہ ہے

آنکھیں ہی آنکھیں جدھر دیکھو نمایاں ہوگئیں

اللہ! اللہ! اس دلِ مجروح کی افسردگی

باغ میں کلیاں چٹک کر پھر سے کلیاں ہوگئیں

حسنِ یوسف میری نظروں میں سماتا ہی نہیں

وہ زلیخا کی نگاہیں تھیں کہ زنداں ہوگئیں

منتشر تھیں جلوہ آرائے ازل کی قوتیں

شوقِ خود بینی میں یک جا ہو کے انساں ہوگئیں

اب خراشِ سینہ کی ہمت کہاں باقی اثرؔ

دل جگر کی قوتیں صرفِ گریباں ہوگئیں