میں اپنے گرد لکیریں بچھائے بیٹھا ہوں

سرائے درد میں ڈیرہ جمائے بیٹھا ہوں

نبیلؔ ریت میں سکّے تلاش کرتے ہوئے

میں اپنی پوری جوانی گنوائے بیٹھا ہوں

یہ شہر کیا ہے نکلتا نہیں کوئی گھر سے

کئی دنوں سے تماشہ لگائے بیٹھا ہوں

جو لوگ درد کے گاہک ہیں سامنے آئیں

ہر ایک گھاؤ سے پردہ اٹھائے بیٹھا ہوں

بہت طلب تھی مجھے روشنی میں آنے کی

سو یوں ہوا ہے کہ آنکھیں جلائے بیٹھا ہوں

یہ دیکھو چاند وہ سورج وہ اُس طرف تارے

اک آسمان زمیں پر سجائے بیٹھا ہوں

نہ جانے کون سا عالم ہے یہ عزیز نبیلؔ

میں ریگزار میں کشتی بنائے بیٹھا ہوں