زندگی میں پہلے اتنی تو پریشانی نہ تھی

تنگ دامانی تھی لیکن چاک دامانی نہ تھی

جام خالی تھے مگر میخانہ تو آباد تھا

چشمِ ساقی میں تغافل تھا پشیمانی نہ تھی

غازۂ غم ایک تھا تھے سب کے چہرے مختلف

غور سے دیکھا تو کوئی شکل انجانی نہ تھی

جن سفینوں نے کبھی توڑا تھا موجوں کا غرور

اُس جگہ ڈوبے جہاں دریا میں طغیانی نہ تھی

تجھ سے امیدِ وفا خوابِ پریشاں تو نہ تھی

بے وفا عمرِ گریزاں تھی کہ طولانی نہ تھی

پڑھ چکا اپنی غزل منظورؔ تو ایسا لگا

مرثیہ تھا دورِ حاضر کا غزل خوانی نہ تھی