نہ اب مسکرانے کو جی چاہتا ہے

نہ آنسو بہانے کو جی چاہتا ہے

ستاتے نہیں وہ تو اُن کی طرف سے

خود اپنے ستانے کو جی چاہتا ہے

کوئی مصلحت روک دیتی ہے ورنہ

پلٹ دیں زمانے کو جی چاہتا ہے

تجھے بھول جانا تو ہے غیر ممکن

مگر بھول جانے کو جی چاہتا ہے

تواضع کر ائے عشق چند آنسوؤں سے

بہت مسکرانے کو جی چاہتا ہے

بہت دیر تک چھپ کے تیری نظر سے

تجھے دیکھ پانے کو جی چاہتا ہے

تری آنکھ کو بھی جو بے خواب کردے

وہ فتنہ جگانے کو جی چاہتا ہے

حسیں تیری آنکھیں حسیں تیرے آنسو

یہیں ڈوب جانے کو جی چاہتا ہے

جگرؔ اب تو وہ بھی یہ کہتے ہیں مجھ سے

ترے ناز اُٹھانے کو جی چاہتا ہے