ہماری آنکھیں بھی ہوجائیں خواب رُو آنکھیں

ہماری آنکھوں پر رکھ دے کبھی جو تُو آنکھیں

ہمیشہ رہتی ہیں تیری تلاش میں جاناں

ہمیشہ کرتی ہیں تیری ہی آرزو آنکھیں

نہ جانے کون سے جلووں کی جستجو ہے اُنہیں

بھٹک رہی ہیں فضا میں جو چار سوُ آنکھیں

یہ معجزہ بھی تو کچھ کم نہیں کہ شام و سحر

تمہارے ہجر میں رہتی ہیں باوضو آنکھیں

ترا فراق تری جستجو تری حسرت

یہ زخم زخم تبسم لہو لہو آنکھیں

نصیب میرا بھی روشن ہر صورتِ مہتاب

کبھی جو کردیں محبت کو سرخ رُو آنکھیں

بچھڑ کے تجھ سے میں زندہ نہ رہ سکوں شاید

نہ پھیرنا کبھی میری طرف سے تُو آنکھیں

تمہیں جو چھولوں تو ہاتھوں سے خوشبوئیں پھوٹیں

تمہیں جو دیکھوں تو ہوجائیں خوب رُو آنکھیں

جہاں لبوں کو ہلانا بھی جرم ہو ماجدؔ

وہاں اشاروں میں کرتی ہیں گفتگو آنکھیں