کچھ کفر نے فتنے پھیلائے کچھ ظلم نے شعلے بھڑکائے

سینوں میں عداوت جاگ اٹھی انسان سے انساں ٹکرائے

پامال کیا برباد کیا کمزور کو طاقت والوں نے

جب ظلم و ستم حد سے گذرے تشریف محمد لے آئے

رحمت کی گھٹائیں لہرائیں دنیا کی امیدیں بھر آئیں

اکرام و عطا کی بارش کی اخلاق کے موتی برسائے

تہذیب کی شمعیں روشن کیں اونٹوں کے چرانے والوں نے

کانٹوں کو گلوں کی قسمت دی ذروں کے مقدر چمکائے

کچھ کیف دیا کچھ ہوشیاری کچھ سوز دیا کچھ ساز دیا

میخانۂ علم و عرفان میں توحید کے ساغر چھلکائے

ہر چیزکو رعنائی دے کر دنیا کو حیاتِ نو بخشی

صبحوں کے بھی چہروں کو دھویا راتوں کے بھی گیسو سلجھائے

اللہ سے رشتے کو جوڑا باطل کے طلسموں کو توڑا

خود وقت کے دھارے کو موڑا طوفاں میں سفینے تیرائے

تلوار بھی دی قرآن بھی دیا دنیا بھی عطا کی عقبی بھی

مرنے کو شہادت فرمایا جینے کے طریقے سمجھائے

مکہ کی زمیں اور عرش کہاں دم بھر میں یہاں پل بھر میں وہاں

پتھر کو عطا گویائی کی اور چاند کے ٹکڑے فرمائے

مظلوموں کی فریاد سنی مجبوروں کی بھی غم خواری کی

زخموں پر خنک مرہم رکھے بے چین دلوں کے کام آئے

عورت کو حیا کی چادر دی غیرت کا غازہ بھی بخشا

شیشوں میں نزاکت پیدا کی کردار کے جوہر چمکائے

توحید کا دھارا رک نہ سکا اسلام کا پرچم جھک نہ سکا

کفار بہت کچھ جھنجلائے شیطاں نے ہزاروں بل کھائے

اے نام محمد صلِّ علی ماہرؔ کے لئے تو سب کچھ ہے

ہونٹوں پہ تبسم بھی آیا آنکوں میں بھی آنسو بھر آئے