ترا شیوہ کرم ہے اور مری عادت گدائی کی

نہ ٹوٹے آس ائے مولا ترے در کے فقیروں کی

ترے دربار سے مایوس پھر جائیں بھلا کیوں کر

کہ تو کرتا رہا ہے خواہشیں پوری حریصوں کی

ادھر بھی ابرِ رحمت آئے اور جم جم کے یوں برسے

کہ ہو سرسبز کھیتی ہم غریبوں بد نصیبوں کی

خزاں میں بھی شجر سرسبز ہو کر پھول بھی لائیں

ہو شہرت باغباں کی باغ کی غنچوں کی پھولوں کی

مری اولاد کو تو یا الہی! اتنی ہمت دے

کہ ہو کر قوتِ بازو خبر لیں ہم ضعیفوں کی

انہیں کے علم اور اقبال کی شہرت جہاں میں ہو

ہے شہرت جیسے عالم میں نبی کے ہم نشینوں کی

ابوبکر و عمر عثماں علی میں جتنے جوہر تھے

وہی جوہر ہو ان میں اور وہی فطرت کریموں کی

ترے دربار سے بہترؔ کی بھی امید بر آئے

علیؔ ٹھنڈک ہو آنکھوں کی علیؔ راحت ہو سینوں کی