جب تک غمِ جہاں کے حوالے ہوئے نہیں

ہم زندگی کے جاننے والے ہوئے نہیں

کہتا ہے آفتاب ذرا دیکھنا کہ ہم

ڈوبے تھے گہری رات میں کالے ہوئے نہیں

چلتے ہو سینہ تان کے دھرتی پہ کس لئے

تم آسماں تو سر پہ سنبھالے ہوئے نہیں

انمول وہ گہر ہیں جہاں کی نگاہ میں

دریا کی جو تہوں سے نکالے ہوئے نہیں

طے کی ہے ہم نے صورتِ مہتاب راہِ شب

طولِ سفر سے پاؤں میں چھالے ہوئے نہیں

ڈس لیں تو اُن کے زہر کا آسان ہے اُتار

یہ سانپ آستین کے پالے ہوئے نہیں

تیشے کا کام ریشۂ گل سے لیا شکیبؔ

ہم سے پہاڑ کاٹنے والے ہوئے نہیں