اداس آنکھوں سے آنسو نہیں نکلتے ہیں

یہ موتیوں کی طرح سیپیوں میں پلتے ہیں

گھنے دھویں میں فرشتے بھی آنکھ ملتے ہیں

تمام رات کھجوروں کے پیڑ جلتے ہیں

میں شاہراہ نہیں راستے کا پتھر ہوں

یہاں سوار بھی پیدل اتر کے چلتے ہیں

انہیں کبھی نہ بتانا میں ان کی آنکھوں میں

وہ لوگ پھول سمجھ کر مجھے مسلتے ہیں

کئی ستاروں کو میں جانتا ہوں بچپن سے

کہیں بھی جاؤں مرے ساتھ ساتھ چلتے ہیں

یہ ایک پیڑ ہے آ اس سے مل کے رولیں ہم

یہاں سے تیرے مرے راستے بدلتے ہیں