اہلِ طوفاں! آؤ دل والوں کا افسانہ کہیں

موج کو گیسو بھنور کو چشمِ جانانہ کہیں

دار پر چڑھ کر لگائیں نعرۂ زلفِ صنم

سب ہمیں با ہوش سمجھیں چاہے دیوانہ کہیں

وہ شہِ خوباں کدھر ہے پھر چلیں اس کے حضور

زندگی کو دل کہیں اور دل کو نذرانہ کہیں

تھامیں اُس بت کی کلائی اور کہیں اِس کو جنوں

چوم لیں منہ اور اسے اندازِ رندانہ کہیں

سرخیٔ مَے کم تھی میں نے چھو لئے ساقی کے ہونٹ

سر جھکا ہے جو بھی اب اربابِ مے خانہ کہیں

تشنگی ہی تشنگی ہے کس کو کہیئے مے کدہ

لب ہی لب ہم نے تو دیکھے کس کو پیمانہ کہیں

پارۂ دل ہے وطن کی سرزمیں مشکل یہ ہے

شہر کو ویراں کہیں یا دل کو ویرانہ کہیں

ائے رخِ زیبا! بتا دے اور ابھی ہم کب تلک

تیرگی کو شمع تنہائی کو پروانہ کہیں

آرزو ہی رہ گئی مجروحؔ کہتے ہم کبھی

اک غزل ایسی جسے تصویرِ جانانہ کہیں