یہ کس نے کہا تم کوچ کرو باتیں نہ بناؤ انشاؔء جی

ابن انشاؔء کی انشاؔء جی اٹھو اب کوچ کرو غزل پر قتیلؔ شفائی کے جوابی غزل

یہ شہر تمہارا اپنا ہے اسے چھوڑ نہ جاؤ انشاؔء جی

جتنے بھی یہاں کے باسی ہیں سب کے سب تم سے پیار کریں

کیا ان سے بھی منہ پھیرو گے یہ ظلم نہ ڈھاؤ انشاؔء جی

کیا سوچ کے تم نے سینچی تھی یہ کیسر کیاری چاہت کی

تم جن کو ہنسانے آئے تھے اُن کو نہ رلاؤ انشاؔء جی

تم لاکھ سیاحت کے ہو دھنی اک بات ہماری بھی مانو

کوئی جا کے جہاں سے آتا نہیں اس دیس نہ جاؤ انشاؔء جی

بکھراتے ہو سونا حرفوں کا تم چاندی جیسے کاغذ پر

پھر اِن میں اپنے زخموں کا مت زہر ملاؤ انشاؔء جی

اک رات تو کیا وہ حشر تلک رکھے گی کھلا دروازے کو

کب لوٹ کے تم گھر آؤ گے سجنی کو بتاؤ انشاؔء جی

نہیں صرف قتیلؔ کی بات یہاں کہیں ساحرؔ ہے کہیں عالیؔ ہے

تم اپنے پرانے یاروں سے دامن نہ چھڑاؤ انشاؔء جی