انشاؔ جی اٹھو اب کوچ کرو اس شہر میں جی کو لگانا کیا

وحشی کو سکوں سے کیا مطلب جوگی کا نگر میں ٹھکانا کیا

اس دل کے دریدہ دامن کو دیکھو تو سہی سوچو تو سہی

جس جھولی میں سو چھید ہوئے اس جھولی کا پھیلانا کیا

شب بیتی چاند بھی ڈوب چلا زنجیر پڑی دروازے میں

کیوں دیر گئے گھر آئے ہو سجنی سے کرو گے بہانا کیا

پھر ہجر کی لمبی رات میاں سنجوگ کی تو یہی ایک گھڑی

جو دل میں ہے لب پر آنے دو شرمانا کیا گھبرانا کیا

اُس روز جو ان کو دیکھا ہے اب خواب کا عالم لگتا ہے

اس روز جو ان سے بات ہوئی وہ بات بھی تھی افسانہ کیا

اس حسن کے سچے موتی کو ہم دیکھ سکیں پر چھو نہ سکیں

جسے دیکھ سکیں پر چھو نہ سکیں وہ دولت کیا وہ خزانہ کیا

اس کو بھی جلا دُکھتے ہوئے من اک شعلہ لال بھبوکا بن

یوں آنسو بن بہہ جانا کیا یوں ماٹی میں مل جانا کیا

جب شہرکے لوگ نہ رستہ دیں کیوں بن میں نہ جابسرام کرے

دیوانوں کی سی نہ بات کرے تو اور کرے دیوانہ کیا