حمد نعت غزل نظم قطعات ترانے مناجات بزم مزاح گیت ادب اطفال رباعی آزاد نظم

فہرست ردیف

منتخب کلام کی ردیف کے آخری حرف کی ترتیب پر فہرست

ہم نے تجھے جانا ہے فقط تیری عطا سے

حمد| عتیق جاذبؔ انتخاب| بزم سخن

ہم نے تجھے جانا ہے فقط تیری عطا سے

سورج کے اجالوں سے فضاوں سے خلاء سے

چاند اور ستاروں کی چمک اور ضیاء سے

جنگل کی خموشی سے پہاڑوں کی انا سے

پُر ہَول سمندر سے پُر اسرار گھٹا سے

بجلی کے چمکنے سے کڑکنے کی صدا سے

مٹی کے خزانوں سے اناجوں سے غذا سے

برسات سے طوفان سے پانی سے ہوا سے

ہم نے تجھے جانا ہے فقط تیری عطا سے

ہر شے کے جھلکتے ہوئے فن اور کلا سے

ہم نے تجھے جانا ہے فقط تیری عطا سے

گلشن کی بہاروں سے تو کلیوں کی حیا سے

معصوم سی روتی ہوئی شبنم کی ادا سے

لہراتی ہوئی بادِ سحر ، بادِ صبا سے

ہر رنگ کے ہر شان کے پھولوں کی قبا سے

چڑیوں کے چہکنے سے تو بلبل کی نوا سے

موتی کی نزاکت سے تو ہیرے کی جلا سے

ہر شے کے جھلکتے ہوئے فن اور کلا سے

ہم نے تجھے جانا ہے فقط تیری عطا سے

دنیا کے حوادث سے وفاؤں سے جفا سے

رنج و غم و آلام سے دردوں سے دوا سے

خوشیوں سے تبسم سے مریضوں کی شفا سے

بچوں کی شرارت سے تو ماؤں کی دعا سے

نیکی سے عبادات سے لغزش سے خطا سے

خود اپنے ہی سینے کے دھڑکنے کی صدا سے

رحمت تیری ہر گام پہ دیتی ہے دلاسے

ہم نے تجھے جانا ہے فقط تیری عطا سے

ابلیس کے فتنوں سے تو آدم کی خطا سے

اوصافِ براہیم سے یوسف کی حیا سے

اور حضرت ایوب کی تسلیم و رضا سے

عیسیٰ کی مسیحائی سے موسیٰ کے عصا سے

نمرود کے فرعون کے انجامِ فنا سے

کعبہ کے تقدس سے تو مرویٰ و صفا سے

تورات سے انجیل سے قرآں کی صدا سے

یٰسین سے طٰہٰ سے مزمل سے نبا سے

اک نور جو نکلا تھا کبھی غارِ حرا سے

ہم نے تجھے جانا ہے فقط تیری عطا سے

پچھلا کلام | اگلا کلام

شاعر کا مزید کلام

ہم نے تجھے جانا ہے فقط تیری عطا سے