حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

تم کہ جانو ہو علاجِ غمِ جاناں جاناں

غزل| صبیحہ خاتون صباؔ انتخاب| قتیبہ جمال

قتیبہ جمال کی پسند / بزم سخن کی جانب سے مزید اضافوں کے ساتھ

تم کہ جانو ہو علاجِ غمِ جاناں جاناں
آ کے کرتے نہیں کیوں درد کا درماں جاناں
غیر کو تم سے علاقہ ہے تمہیں غیر سے ہے
میرا جیسے بھی کٹے عرصۂ ہجراں جاناں
پہلے لاتے تھے کبھی جاں تو کبھی تحفۂ دل
اب کے سوغات میں لائے تو نمک داں جاناں
عشق جب موج میں آئے وہ اعجاز دکھائے
دستِ موسیٰ کو بنا دے یدِ تاباں جاناں
کوئی منعم ہو تو اک حرف سے کر دیتا ہے
داغِ کف چاند کی مانند درخشاں جاناں
ایک ہم ہیں کہ مجسم خس و خاشاک ہوئے
پھر بھی اب تک ہیں وہی سوختہ ساماں جاناں
عہدِ حاضر میں کہ رفتار ہے پابندِ سفر
منزلیں سب کے لئے ہو گئیں آساں جاناں
کیا قیامت ہے کہ پیدا نہیں وہ تختِ رواں
لائے بلقیس کو جو سوئے سلیماں جاناں
ہم بھی پہلو میں زلیخائیِ دل رکھتے ہیں
کیا ہوا تم جو ہوۓ یوسفِ کنعاں جاناں
ہاں مگر ہم کو رقیبوں سے شکایت ہوگی
تم کو دیکھے سے ہوۓ گر وہ پریشاں جاناں
وہ نمو ہے کہ ہر اک شاخ عروسِ گل ہے
اور ہم ہیں کہ وہی خارِ بداماں جاناں
کیا ضروری تھا کہ اک عمر کی دوری پہ رہیں
یوں ہی ہونا تھا جو نزردیکِ رگِ جاں جاناں
تا کہ وحشت کا گل و لالہ پہ الزام نہ آئے
سوزنِ خار سے سیتے ہیں گریباں جاناں
غنچۂ دل تھا سو پامال ہوا شامِ خزاں
اب جو آئی بھی تو کیا صبحِ بہاراں جاناں
اب کہ ممتاز محل تاج محل شاہ جہاں
ہو گئے قصۂ پارینہ کے عنواں جاناں
کیوں نہ تعمیر کریں درد کا وہ قصرِ سخن
جس میں ہم تم رہیں اک ساتھ غزل خواں جاناں
اس کی فرخندہ نصیبی کا خیال آتا ہے
جس کے اعزاز میں ہم سے ہو گریزاں جاناں
ہاں وہی ہم کو پکارو جو غزل کی ہے ردیف
ہم کہ اس طرزِ تخاطب پہ ہیں نازاں جاناں
کیا ہوا رات کے آنچل پہ ستارے جو نہیں
میری پلکوں پہ تو رہتا ہے چراغاں جاناں
ظلمتِ شب میں تری یاد چلی آتی ہے
بزمِ انجم کو سجانے سرِ مژگاں جاناں

اور صباؔ ہے کہ پئے چارہ گری جائے ہے
بے ستوں کوہ کبھی دشتِ غزالاں جاناں

پچھلا کلام | اگلا کلام

شاعر کا مزید کلام