تضادِ جذبات میں یہ نازک مقام آیا تو کیا کرو گے

میں رو رہا ہوں تو ہنس رہے ہو میں مسکرایا تو کیا کروگے

مجھے تو اس درجہ وقتِ رخصت سکوں کی تلقین کررہے ہو

مگر کچھ اپنے لئے بھی سوچا میں یاد آیا تو کیا کروگے

کچھ اپنے دل پر بھی زخم کھاؤ مرے لہو کی بہار کب تک

مجھے سہارا بنانے والو میں لڑکھڑایا تو کیا کروگے

تمہارے جلوؤں کی روشنی میں نظر کی حیرانیاں مسلم

مگر کسی نے نظر کے بدلے دل آزمایا تو کیا کروگے

اُتر تو سکتے ہو پار لیکن مآل پر بھی نگاہ کر لو

خدا نہ کردہ سکونِ ساحل نہ راس آیا تو کیا کروگے

ابھی تو تنقید ہو رہی ہے مرے مذاقِ جنوں پہ لیکن

تمہاری زلفوں کی برہمی کا سوال آیا تو کیا کروگے

ابھی تو دامن چھڑا رہے ہو بگڑ کے قابلؔ سے جا رہے ہو

مگر کبھی دل کی دھڑکنوں میں شریک پایا تو کیا کرو گے