جب غم کی لطافت بڑھتی ہے جب درد گوارا ہوتا ہے

اشکوں میں تبسم ڈھلتا ہے فریاد میں نغمہ ہوتا ہے

جب نام تمہارا آتا ہے جب ذکر تمہارا ہوتا ہے

آنکھوں میں چمک آ جاتی ہے دل ہے کہ دھڑکتا ہوتا ہے

فرقت کی بھیانک راتوں میں کیا طرفہ تماشا ہوتا ہے

شمعیں بھی فروزاں رہتی ہیں اور گھر میں اندھیرا ہوتا ہے

بیمار کی حالت کیا کہیئے درد آخری حد میں آ پہنچا

پرسش کا زمانہ بیت گیا تسکین سے اب کیا ہوتا ہے

سورج کی شعاعیں افسردہ آنکھیں پرنم دل پژمردہ

اک جب بھی سویرا ہوتا تھا اک اب بھی سویرا ہوتا ہے

وہ یاد سلامت ہے جب تک دنیا کے غموں کی کیا پروا

کانٹوں میں بھی رہ کر ائے ہمدم پھولوں میں بسیرا ہوتا ہے

یہ واعظ و صوفی کی باتیں ہر بات کی سو سو تاویلیں

معنی کی خبر دونوں کو نہیں الفاظ پہ جھگڑا ہوتا ہے

سمجھو تو خموشی سب کچھ ہے دیکھو تو خموشی کچھ بھی نہیں

آواز بھی ہے الفاظ بھی ہیں مفہوم بھی پیدا ہوتا ہے

ماہرؔ مرے شعروں کے خاکے اس طرح مرتب ہوتے ہیں

کچھ دل بھی تقاضا کرتا ہے کچھ اُن کا اشارہ ہوتا ہے