دل کی بستی کو نہ ویران بنائے رکھنا

کچھ نہ ہو اور تو یادوں سے سجائے رکھنا

رشتۂ درد سے پائندہ نہیں رشتہ کوئی

مری اس بات کو سینے سے لگائے رکھنا

بجھ گئے اب کے تو شاید نہ جلیں پھر یہ کبھی

ان چراغوں کو ہواوؤں سے بچائے رکھنا

خونِ دل سے کہ نمِ اشک سے ہو جیسے بھی ہو

پھول جو تم نے کھلائے ہیں کھلائے رکھنا

نہ سہی میل ملاقات کا یادوں کا سہی

ہم سے جیسے بھی بنے رشتہ بنائے رکھنا

جذبۂ دل نے ترے شہر میں بھی کیا سیکھا

خشک دریاؤں میں طوفان اٹھائے رکھنا

دل کے ماحول کو ظلمت سے بچانے کے لئے

اپنی پلکوں پہ ستاروں کو سجائے رکھنا

شاید آ نکلوں کسی رات پھر اس شہر کی سمت

جو دیئے تم نے جلائے ہیں جلائے رکھنا