حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

پھرے راہ سے وہ یہاں آتے آتے

غزل| مرزا داغؔ دہلوی انتخاب| بزم سخن

پھرے راہ سے وہ یہاں آتے آتے
اجل مر رہی تو کہاں آتے آتے
نہ جانا کہ دنیا سے جاتا ہے کوئی
بہت دیر کی مہرباں آتے آتے
یقیں ہے کہ ہو جائے آخر کو سچی
مرے منہ میں تیری زباں آتے آتے
سنانے کے قابل جو تھی بات اُن کو
وہی رہ گئی درمیاں آتے آتے
ابھی سن ہی کیا ہے جو بے باکیاں ہوں
اُنہیں آئیں گی شوخیاں آتے آتے
کلیجا مرے منہ کو آئے گا اک دن
یوں ہی لب پہ آہ و فغاں آتے آتے
نتیجہ نہ نکلا تھکے سب پیامی
وہاں جاتے جاتے یہاں آتے آتے
تمہارا ہی مشتاقِ دیدار ہوگا
گیا جان سے اک جواں آتے آتے
کسی نے کچھ اُن کو ابھارا تو ہوتا
نہ آتے نہ آتے یہاں آتے آتے
بنا ہے ہمیشہ یہ دل باغ و صحرا
بہار آتے آتے خزاں آتے آتے
نہیں کھیل ائے داغؔ یاروں سے کہہ دو
کہ آتی ہے اردو زباں آتے آتے

پچھلا کلام | اگلا کلام

شاعر کا مزید کلام