رسولِ مجتبےٰ کہیئے محمد مصطفےٰ کہیئے

خدا کے بعد بس وہ ہیں پھر اس کے بعد کیا کہیئے

شریعت کا ہے یہ اصرار ختم الانبیاء کہیئے

محبت کا تقاضا ہے کہ محبوبِ خدا کہیئے

جبیں و رخ محمد کے تجلی ہی تجلی ہیں

کسے شمس الضحیٰ کہیئے کسے بدر الدجیٰ کہیئے

جب ان کا ذکر ہو دنیا سراپا گوش بن جائے

جب ان کا نام آئے مرحبا صلّ علیٰ کہیئے

غبارِ راہِ طیبہ سرمۂ چشمِ بصیرت ہے

یہی وہ خاک ہے جس خاک کو خاکِ شفا کہیئے

صداقت پر بِنا رکھی گئی ہے دینِ فطرت کی

اسی تعبیر کو انسانیت کا ارتقا کہیئے

مرے سرکار کے نقشِ قدم شمعِ ہدایت ہیں

یہ وہ منزل ہے جس کو مغفرت کا راستہ کہیئے

محمد کی نبوت دائرہ ہے جلوۂ حق کا

اسی کو ابتدا کہیئے اسی کو انتہا کہیئے

مدینہ یاد آتا ہے تو پھر آنسو نہیں رکتے

مری آنکھوں کو ماہرؔ چشمۂ آب بقا کہیئے