تم زمانہ آشنا تم سے زمانہ آشنا

اور ہم اپنے لئے بھی اجنبی نا آشنا

راستے بھر کی رفاقت بھی بہت ہے جانِ من

ورنہ منزل پر پہنچ کر کون کس کا آشنا

اب کے ایسی آندھیاں اٹھیں کہ سورج بجھ گئے

ہائے وہ شمعیں کہ جھونکوں سے بھی تھیں نا آشنا

مدتیں گذریں اِسی بستی میں لیکن اب تلک

لوگ ناواقف فضا بیگانہ ہم نا آشنا

ہم بھرے شہروں میں بھی تنہا ہیں جانے کس طرح

لوگ ویرانوں میں کر لیتے ہیں پیدا آشنا

اپنی بربادی پہ کتنے خوش تھے ہم لیکن فرازؔ

دوست دشمن کا نکل آیا ہے اپنا آشنا