چمن روئے ہنسے شبنم بیاباں پر نکھار آئے

اک ایسا بھی نیا موسم مرے پروردگار آئے

وہ سر کھولے ہماری لاش پر دیوانہ وار آئے

اسی کو موت کہتے ہیں تو یارب بار بار آئے

سرِ گورِ غریباں آؤ لیکن یہ گذارش ہے

وہاں منہ پھیر کے رونا جہاں میرا مزار آئے

بہا ائے چشمِ تر ایسا بھی اک آنسو ندامت کا

جسے دامن پہ لینے رحمتِ پروردگار آئے

قفس کے ہو لئے ہم تو مگر ائے اہلِ گلشن تم

ہمیں بھی یاد کر لینا چمن میں جب بہار آئے

نہ جانے کیا سمجھ کر چپ ہوں ائے صیاد میں ورنہ

وہ قیدی ہوں اگر چاہوں قفس میں بھی بہار آئے

قمرؔ! دل کیا ہے میں تو اُن کے خاطر جان بھی دے دوں

مری قسمت اگر اُن کو نہ پھر بھی اعتبار آئے