ہم نے تو اس عشق میں یارو کھینچے ہیں آزار بہت

تم کچھ اُس کی بات کرو ہے جس سے تم کو پیار بہت

لوگ ہم ایسے نادانوں کو آئیں گے سمجھانے بھی

تیرا غم پھر تیرا غم ہے غم ہے تو غم خوار بہت

آئے موسمِ گل دیکھیں وہ کس کس کو زنجیر کریں

اب کے سنا ہے اہلِ چمن بھی بیٹھے ہیں بیزار بہت

اُن کو بے حس جان نہ ساقی اولِ شب ہے بادہ نوش

رات ڈھلے محسوس کریں گے شیشے کی جھنکار بہت

اپنا اپنا حسنِ نظر ہے اپنی اپنی منزل ہے

شرط میسر آتا ہے تو سایۂ زلفِ یار بہت