اپنی تو ہجر میں ہی کٹیں راتیں کالیاں

بانہیں گلے میں یار نے کب آ کے ڈالیاں

اس کی کمر تو کاہے تو پتلی ہے اس قدر

یہ ہم سے شاعروں کی ہیں نازک خیالیاں

اودھر* سے شوقِ دید ہے اتنا کہ ہر طرف

دیوار میں ہیں رخنے تو غرفوں میں جالیاں

لوہو* بھرا ہے ہاتھ حنائی نہ بوجھیو

از بس کہ اس نے کتنوں کی جانیں نکالیاں

کرتی ہیں خون سینکڑوں تجھ کو بتاؤں کون

پانوں* کی سرخیاں ترے ہونٹوں کی لالیاں

کل کر رہا تھا غیر سے نظروں میں گفتگو

پر دیکھتے ہی کچھ مرے آنکھیں چرا لیاں

اے مصحؔفی ! تو ان سے محبت نہ کیجیو

ظالم غضب ہی ہوتی ہیں یہ دلّی والیاں