از بس کہ چشمِ تر نے بہاریں نکالیاں

مژگاں ہیں اشکِ سرخ سے پھولوں کی ڈالیاں

کیا جانے ہے وہ طرّۂ مقطوع کس کے ہاتھ

آنکھوں میں کاٹتا ہوں میں نت راتیں کالیاں

خط آئے پر بھی یار کا بدلا نہیں مزاج

وہ ہی ادا و ناز ہے ویسی ہی گالیاں

صیّاد چاہتا ہے جو بلبل کی زندگی

کنجِ قفس میں رکھ تو گلوں کی پیالیاں

کیا اعتماد یاں کے دِلا عزل و نصب کا

ایدھر تِغیریاں* تو اُدھر ہیں بحالیاں

آنکھوں میں جوشِ اشک سے اب یاں وہ حال ہے

جیسے کہ سیم خام سے پُر ہوں کٹھالیاں*

میرا یہ طفلِ دل تبھی حلقہ بگوش تھا

اے شوق جن دنوں تری زلفیں تھیں بالیاں

امرد پرست جان نہ دیں کیوں کہ مصحفیؔ

دل مرد ہو کے لیتی ہیں یہ چیرے* والیاں