اِدھر برقِ تپاں رکھ دی اُدھر برقِ تپاں رکھ دی

محبت میں میری ہستی غضب کے درمیاں رکھ دی

میرے سینے میں دل رکھا میرے منہ میں زباں رکھ دی

جہاں رکھنے کی جو تھی چیز قدرت نے وہاں رکھ دی

یہ کس نے شاخِ گل لا کر قریبِ آشیاں رکھ دی

کہ میں نے شوقِ گل بوسی میں کانٹوں پر زباں رکھ دی

دعا جب بے اثر ٹھہری تو پھر حکمِ دعا کیوں ہے

میری باتوں سے تھی نفرت تو کیوں منہ میں زباں رکھ دی

جو دل اُن سے طلب میں نے کیا تو یوں لگے کہنے

ذرا سی چیز تھی ہم نے خدا جانے کہاں رکھ دی

سنا تھا قصہ خواں کوئی نیا قصہ سنائے گا

ہمارے منہ پہ ظالم نے ہماری داستاں رکھ دی

خلوصِ دل سے سجدہ ہو تو اس سجدے کا کیا کہنا

وہیں کعبہ سرک آیا جبیں ہم نے جہاں رکھ دی

اٹھایا میں نے شام ہجرِ لُطفِ گفتگو کیا کیا

تصور نے تری تصویر کے منہ میں زباں رکھ دی