ترکِ محبت اپنی خطا ہو ایسا بھی ہو سکتا ہے

وہ اب بھی پابندِ وفا ہو ایسا بھی ہو سکتا ہے

دروازے پر آہٹ سن کر اُس کی طرف کیوں دھیان گیا

آنے والی صرف ہوا ہو ایسا بھی ہو سکتا ہے

حالِ پریشاں سن کر میرا آنکھ میں اُس کی آنسو ہیں

میں نے اُس سے جھوٹ کہا ہو ایسا بھی ہو سکتا ہے

عرضِ طلب پر اُس کی چپ سے ظاہر ہے انکار مگر

شاید وہ کچھ سوچ رہا ہو ایسا بھی ہو سکتا ہے

حدِ نظر تک صرف دھواں تھا برق پہ کیوں الزام رکھیں

آتشِ گل سے باغ جلا ہو ایسا بھی ہو سکتا ہے

خون بہانا اُس کا شیوہ ہے تو سہی منظورؔ مگر

ہاتھ پہ اُس کے رنگِ حنا ہو ایسا بھی ہو سکتا ہے