برباد نہ کر بے کس کا چمن بے درد خزاں سے کون کہے

تاراج نہ کر میرا خرمن اس برقِ تپاں سے کون کہے

مجھ خستہ جگر کی جان نہ لے یہ کون اجل کو سمجھائے

کچھ دیر ٹھہر جا ائے دریا دریائے رواں سے کون کہے

ہر چند ہماری حالت پر رحم آتا ہے ہر اک کو لیکن

کون آپ کو آفت میں ڈالے اس آفتِ جاں سے کون کہے

ہر چند بہت غم ہیں پہناں اور دل میں ہزاروں ہیں ارماں

اس برقِ مجستم کے آگے حال اپنا زباں سے کون کہے

قاصد کے بیاں کا اے امجدؔ کیوں کر ہو اثر ان کے دل پر

جس درد سے تم خود کہتے ہو اس طرزِ بیاں سے کون کہے