یہ رُکے رُکے سے آنسو یہ گھٹی گھٹی سی آہیں

یوں ہی کب تلک خدایا غمِ زندگی بناہیں

کہیں ظلمتوں میں گھِر کر ہے تلاشِ دستِ رہبر

کہیں جگمگا اُٹھی ہیں مرے نقشِ پا سے راہیں

ترے خانما خرابوں کا چمن کوئی نہ صحراء

یہ جہاں بھی بیٹھ جائیں وہیں اُن کی بارگاہیں

کبھی جادۂ طلب سے جو پھرا ہوں دل شکستہ

تری آرزو نے ہنس کر وہیں ڈال دی ہیں بانہیں

مرے عہد میں نہیں ہے یہ نشانِ سر بلندی

یہ رنگے ہوئے عمامے یہ جھکی جھکی کلاہیں