امیرؔ مینائی

اردو زبان و ادب کے مشہور و معروف نعت خواں شاعر اور ’’خنجر چلے کسی پہ تڑپتے ہیں ہم امیرؔ / سارے جہاں کا درد ہمارے جگر میں ہے‘‘ مشہور و معروف شعر لکھنے والے شاعر جناب امیر مینائی 21/ فروری 1829ء کو لکھنؤ میں پیدا ہوئے۔

آپ کا اصل نام امیر احمد اور تخلص امیرؔ تھا ، خاندانِ صابریہ چشتیہ کے سجادہ نشین حضرت امیر شاہ سے بیعت اور مخدوم شاہ مینا سے خاندانی تعلق کی وجہ سے مینائی کہلائے ، ابتدائی تعلیم فرنگی محل میں حاصل کی ، بچپن ہی سے شعر و سخن کا ذوق تھا اور اسی ذوق و شوق میں جناب مظفر علی اسیؔر لکھنوی کی شاگردی اختیارکی ، 1852ء میں نواب واجد علی شاہ کے دربار سے تعلق ہوا اور ان کی ایماء پر دو کتابیں ’’شاد سلطان‘‘ اور ’’ہدایت سلطان‘‘ تصنیف کیں ، پھر وہاں سے نواب یوسف علی خاں کی دعوت پر رامپور گئےاور نواب صاحب کے انتقال کے بعد رامپور چھوڑ حیدر آباد دکن گئے اور 13/ اکتوبر 1900ء کو وہیں انتقال کیا۔

جناب امیرؔ مینائی اردو شعر و ادب میں ایک معتبر حوالہ کا درجہ رکھتے ہیں ، یہی وجہ ہے کہ مشہور و معروف شعراء میں جناب ریاضؔ خیرآبادی ، جلیلؔ مانک پوری، مضطرؔ خیرآبادی اور حفیظؔ جونپوری ان کے شاگرد گردانے جاتے ہیں ، ساتھ ساتھ متعدد کتابوں کے مصنف بھی ہیں ، شعر و سخن میں ’’مراۃ الغیب‘‘ ،’’صنم خانۂ عشق‘‘ ، ایک نعتیہ مجموعہ ’’محمد خاتم النبین‘‘ ، مثنوی میں’’نورِ تجلی‘‘ اور ’’ابرِ کرم‘‘ مقبول ہیں جب کہ نثرمیں ’’یادگار شعرائے رام پور‘‘ آپ کی تحقیق سے مزین ہے ، ماہر لغات ہونے کی بنا پر ’’امیر اللغات‘‘ کی تین جلدیں بھی ترتیب دی ہیں اور’’سرمۂ بصیرت‘‘ کے نام سے ایک فرہنگ و قاموس بھی ہے۔

تصویر / نعت کائنات

---

امیرؔ مینائی کا منتخب کلام

• ہیں نہ زندوں میں نہ مردوں میں کمر کے عاشق
• عجب عالم ہے اس کا وضع سادی شکل بھولی ہے
• اس کی حسرت ہے جسے دل سے مٹا بھی نہ سکوں
• سرکتی جائے ہے رخ سے نقاب آہستہ آہستہ
• الفت میں برابر ہے وفا ہو کہ جفا ہو
• اچھے عیسیٰ ہو مریضوں کا خیال اچھا ہے
• ہوئے نامور بے نشاں کیسے کیسے
• پوچھا نہ جائے گا جو وطن سے نکل گیا
• فنا کیسی بقا کیسی جب اُس کے آشنا ٹہرے
• تیر کھانے کی ہوس ہے تو جگر پیدا کر
• یہ سب ظہورِ شانِ حقیقت بشر میں ہے
• جب سے بلبل تُو نے دو تنکے لئے