حمدنعتغزلنظمقطعاتترانےمناجاتبزم مزاحگیت
فہرست ردیف
منتخب کلام کی ردیف کے آخری حرف کی ترتیب پر فہرست

چمن والو! ملالِ آشیاں سے کچھ نہیں ہوتا

غزل| محمد حسین فطرتؔ انتخاب| بزم سخن

چمن والو! ملالِ آشیاں سے کچھ نہیں ہوتا
رہو بیدار تو برقِ تپاں سے کچھ نہیں ہوتا
اڑیں گر دھجیاں دامانِ تمکیں کی تو لطف آئے
محبت میں خیالی داستاں سے کچھ نہیں ہوتا
جنوں میں حوصلہ درکار ہے خارا شگافی کا
فقط گلکاریٔ لفظ و بیاں سے کچھ نہیں ہوتا
غمِ نفع و ضرر سے بے نیازی شرطِ الفت ہے
محبت میں غمِ سود و زیاں سے کچھ نہیں ہوتا
چمن والو! ہے ذہن و فکر کی تعمیر بھی لازم
فقط تعمیرِ باغ و آشیاں سے کچھ نہیں ہوتا
تگ و تازِ جنوں لازم پئے تجدید فصلِ گُل
فقط اندیشۂ عہدِ خزاں سے کچھ نہیں ہوتا
لبِ گُل کے تبسم سے بہار آتی ہے گلشن پر
کہو شبنم سے فریاد و فغاں سے کچھ نہیں ہوتا
اگر سینے میں زندہ ذوقِ تعمیرِ نشیمن ہے
شرر افشانیٔ برقِ تپاں سے کچھ نہیں ہوتا
اُنہی پر ہے مدارِ انقلابِ گلشنِ ہستی
یہ مت سوچو! طیورِ ناتواں سے کچھ نہیں ہوتا
حیاتِ جاوداں کے واسطے خونِ جگر پگھلا
تمنائے حیاتِ جاوداں سے کچھ نہیں ہوتا
گُل و لالہ بھی لُٹتے ہیں تو جلتے ہیں نشیمن بھی
گلستاں کا تحفظ باغباں سے کچھ نہیں ہوتا
چمن والو! نگاہ و فکر پر بھی کچھ بہار آئے
فقط رقصِ نسیمِ گلستاں سے کچھ نہیں ہوتا
سفر کی مشکلوں میں کون کس کا ساتھ دیتا ہے
مصائب میں امیرِ کارواں سے کچھ نہیں ہوتا
ترقی آدمی کی وجہِ حیرت ہے مگر فطرتؔ
فقط تسخیرِ ماہ و کہکشاں سے کچھ نہیں ہوتا

پچھلا کلام | اگلا کلام

شاعر کا مزید کلام