سمجھے تھے آشیانہ ہے زنداں میں آ گئے

اُف کس نظر فریبیٔ عنواں میں آ گئے

یوں چاک بڑھ رہے ہیں کہ اللہ کی پناہ

دامن بھی اب حدودِ گریباں میں آ گئے

اپنے غموں کو نام دوں اب کیا الگ الگ

جتنے بھی غم تھے سب غمِ دوراں میں آ گئے

ناصح نے چھیڑ دی ہے جنون و خرد کی بات

لو پھر نزاعِ مشکل و آساں میں آ گئے

وقفہ وہ ڈھونڈتا تھا نئے جور کے لئے

اور ہم فریبِ چشمِ پشیماں میں آ گئے

ہے ایک درس حسن کی فنکاریٔ کلام

مشکل سخن تبسمِ آساں میں آ گئے

دل اعترافِ جرم سے پھر جگمگا اٹھا

سب داغ دُھل کے اشکِ پشیماں میں آ گئے

صحرا کو نام دو نہ چمن کا جو چند پھول

کانٹوں کے ساتھ الجھ کے بیاباں میں آ گئے

پائندہ کچھ سرود بھی ملّاؔ زہے نصیب

میری حدیثِ عمرِ گریزاں میں آ گئے