جب بے خودی سے ہوش کا یارانہ ہوگیا

غزل| نریش کمار شادؔ انتخاب| بزم سخن

جب بے خودی سے ہوش کا یارانہ ہوگیا
دیر و حرم کا نام بھی مے خانہ ہوگیا
اِن گل رُخوں کو جب سے ہوا شوقِ میکشی
جو پھول تھا چمن میں وہ پیمانہ ہوگیا
ائے ہم نشیں! اذیتِ فرزانگی نہ پوچھ
جس میں ذرا بھی عقل تھی دیوانہ ہوگیا
بس اُس نگاہِ ناز سے ملنے کی دیر تھی
جو غم بھی دل میں تھا غمِ جانانہ ہوگیا
میرے ہی دل کی آگ کا شعلہ تھا وہ کوئی
جو انتہائے شوق میں پروانہ ہوگیا
جب آپ آ گئے رُخِ تاباں لئے ہوئے
پُرنور زندگی کا سیہ خانہ ہوگیا
یہ رونقیں کہاں مرے دل کو نصیب تھیں
آباد تیرے غم سے یہ کاشانہ ہوگیا
طے ہوسکا نہ مرحلۂ شوق عقل سے
لیکن بہ فیضِ لغزشِ مستانہ ہوگیا
میخوار شادؔ بھی ہے بس اتنی سی بات ہے
اتنی سی بات کا مگر افسانہ ہوگیا


پچھلا کلام | اگلا کلام

شاعر کا مزید کلام