خنجر کی طرح بوئے سمن تیز بہت ہے

موسم کی ہوا اب کے جنوں تیز بہت ہے

راس آئے تو ہر سر پہ بہت چھاؤں گھنی ہے

ہاتھ آئے تو ہر شاخ ثمر بیز بہت ہے

لوگو مری کِلکاریٔ وحشت کا صلہ کیا

دیوانے کو اک حرف دل آویز بہت ہے

منعم کی طرح پیرِ حرم پیتے ہیں وہ جام

رندوں کو بھی جس جام سے پرہیز بہت ہے

مصلوب ہوا کوئی سرِ راہ تمنا

آوازِ جرس پچھلے پہر تیز بہت ہے

مجروحؔ سنے کون تری تلخ نوائی

گفتارِ عزیزاں شکر آمیز بہت ہے