چراغِ طور جلاؤ بڑا اندھیرا ہے

ذرا نقاب اٹھاؤ بڑا اندھیرا ہے

وہ جن کے ہوتے ہیں خورشید آستینوں میں

انہیں کہیں سے بلاؤ بڑا اندھیرا ہے

مجھے خود اپنی نگاہوں پہ اعتماد نہیں

مرے قریب نہ آؤ بڑا اندھیرا ہے

فرازِ عرش سے ٹوٹا ہوا کوئی تارہ

کہیں سے ڈھونڈ کے لاؤ بڑا اندھیرا ہے

ابھی تو صبح کے ماتھے کا رنگ کالا ہے

ابھی فریب نہ کھاؤ بڑا اندھیرا ہے

بصیرتوں پہ اُجالوں کا خوف طاری ہے

مجھے یقین دلاؤ بڑا اندھیرا ہے

جسے زبانِ خرد میں شراب کہتے ہیں

وہ روشنی سی پلاؤ بڑا اندھیرا ہے

بنامِ زہرہ جبینانِ خطۂ فردوس

کسی کرن کو جگاؤ بڑا اندھیرا ہے