کل چودھویں کی رات تھی شب بھر رہا چرچا ترا


04-08-2016 | ابن انشاءؔ

کل چودھویں کی رات تھی شب بھر رہا چرچا ترا

کچھ نے کہا ۔۔ یہ چاند ہے ، کچھ نہ کہا ۔۔ چہرا ترا

ہم بھی وہیں موجود تھے ہم سے بھی سب پوچھا کئے

ہم ہنس دیئے ، ہم چپ رہے ، منظور تھا پردا ترا

اس شہر میں کس سے ملیں ہم سے تو چھوٹیں محفلیں

ہر شخص تیرا نام لے ۔۔۔۔ ہر شخص دیوانہ ترا

ہم ۔۔۔ اور رسمِ بندگی ۔۔۔ آشفتگی ۔۔۔ افتادگی 

احسان ہے کیا کیا ترا ۔۔۔ ائے حسنِ بے پروا ترا

ہم پر یہ سختی کی نظر ۔۔۔ ہم ہیں فقیرِ رہ گزر

رستہ ۔۔ کبھی روکا ترا ، دامن ۔۔ کبھی تھاما ترا

ہاں ہاں تری صورت حسیں لیکن تو ایسا بھی نہیں 

اس شخص کے اشعار سے ، شہرہ ہوا ۔۔ کیا کیا ترا

 

بے درد سننی ہو تو چل کہتا ہے کیا اچھی غزل

عاشق ترا ،  رسوا ترا ، شاعر ترا ، انشاؔ ترا




پچھلا صفحہ | اگلا صفحہ



شاعر کا مزید کلام
انشاؔ جی اٹھو اب کوچ کرو اس شہر میں جی کو لگانا کیا
اور تو کوئی بس نہ چلے گا ہجر کے درد کے ماروں کا
کل چودھویں کی رات تھی شب بھر رہا چرچا ترا
دل ہجر کے درد سے بوجھل ہے اب آن ملو تو بہتر ہو
دل عشق میں بے پایاں ، سودا ہو تو ایسا ہو