انتظامات نئے سر سے سنبھالے جائیں

جتنے کم ظرف ہیں محفل سے نکالے جائیں

مرا گھر آگ کی لپٹوں میں چھپا ہے لیکن

جب مزا ہے ترے آنگن میں اجالے جائیں

غم سلامت ہے تو پیتے ہی رہیں گے لیکن

پہلے میخانے کے حالات سنبھالے جائیں

خالی وقتوں میں کہیں بیٹھ کے رو لیں یارو

فرصتیں ہیں تو سمندر ہی کھنگالے جائیں

خاک میں یوں نہ ملا ضبط کی توہین نہ کر

یہ وہ آنسو ہیں جو دنیا کو بہا لے جائیں

ہم بھی پیاسے ہیں یہ احساس تو ہو ساقی کو

خالی شیشے ہی ہواوؤں میں اچھالے جائیں

آؤ بستی میں نئے دوست بنائیں راحتؔ

آستینوں میں چلو سانپ ہی پالے جائیں