فضا کو دیکھ کے ذوقِ نظر پہ کیا گزری

نہ پوچھئے ہوسِ بال و پر پہ کیا گزری

تمہیں کچھ اس کی خبر بھی ہے ائے چمن والو

سحر کے بعد نسیمِ سحر پہ کیا گزری

یہ کاش تجھ کو بھی ذوقِ نظر بتا سکتا

تری تلاش میں ذوقِ نظر پہ کیا گزری

شکستہ شیشہ جو پھر شیشہ گر سے جڑ نہ سکے

خبر نہیں کہ دلِ شیشہ گر پہ کیا گزری

حضورِ دوست کا عالم بتا نہیں سکتا

میں کیا کہوں مرے قلب و نظر پہ کیا گزری

نظر تو محوِ غمِ جستجو تھی ائے آزادؔ

یہ اس کے ساتھ دلِ بے خبر پہ کیا گزری