کوئی آتش در سبو شعلہ بہ جام آ ہی گیا

غزل| مجروحؔ سلطان پوری انتخاب| بزم سخن

کوئی آتش در سبو شعلہ بہ جام آ ہی گیا
آفتاب آ ہی گیا ماہِ تمام آ ہی گیا
محتسب ساقی کی چشمِ نیم وا کو کیا کروں
میکدے کا در کھلا گردش میں جام آ ہی گیا
اک ستم گر تو کہ وجہِ صد خرابی تیرا درد
اک بَلا کش میں کہ تیرا درد کام آ ہی گیا
ہم قفس صیاد کی رسمِ زباں بندی کی خیر
بے زبانوں کو بھی اندازِ کلام آ ہی گیا
آخرش مجروحؔ کے بے رنگ روز و شب میں وہ
صبحِ عارض پر لئے زلفوں کی شام آ ہی گیا


پچھلا کلام | اگلا کلام

شاعر کا مزید کلام