تکلف برطرف ائے دوستو! جب شام آتی ہے

نہ تقوی کام آتا ہے نہ توبہ کام آتی ہے

دلی نسبت کسی شئے سے ہو آخر کام آتی ہے

شکستِ دل سے آوازِ شکستِ جام آتی ہے

یہ وہ آتے ہیں آنکھوں میں حیا کی سرخیاں لے کر

کہ حسن و رنگ میں ڈوبی ہوئی اک شام آتی ہے

اجالا ہی نہیں اے کم نظر راہِ تمنا میں

بصیرت ہو تو اکثر تیرگی بھی کام آتی ہے

مجھے محسوس ہوتا ہے ترے نغمے شرابی ہیں

مغنی! ان سے بھی بوئے مئے گلفام آتی ہے

تمہاری رہبری بھی رہزنی سے کم نہیں لیکن

ہماری گمرہی بھی رہرووں کے کام آتی ہے

بھٹک جائے کوئی کم سن حسینہ جیسے جنگل میں

خوشی یوں میرے دل میں لرزہ براندام آتی ہے

کسی کو کامیابِ آرزو جب دیکھ لیتا ہوں

نہ جانے کیوں تری یاد ائے دلِ ناکام آتی ہے

سمجھ لیتے ہیں ہم ائے شادؔ اسے بھی گردشِ ساغر

کبھی جو مئے کدہ میں گردشِ ایام آتی ہے