دستِ منعم مری محنت کا خریدار سہی

کوئی دن اور میں رسوا سرِ بازار سہی

پھر بھی کہلاؤں گا آوارۂ گیسوئے بہار

میں ترا دامِ خزاں لاکھ گرفتار سہی

جست کرتا ہوں تو لڑ جاتی ہے منزل سے نظر

حائلِ راہ کوئی اور بھی دیوار سہی

غیرتِ سنگ ہے ساقی یہ گلوئے تشنہ

ترے پیمانے میں جو موج ہے تلوار سہی

میں نے دیکھی ہے اُسی میں غمِ دوراں کی جھلک

بے خبر رنگِ جہاں سے نگہِ یار سہی

اُن سے بچھڑے ہوئے مجروحؔ زمانہ گذرا

اب بھی ہونٹوں پہ وہی گرمیٔ رخسار سہی