خانہ ویرانی سے کتنا خوش دلِ مایوس ہے

یہ وہی منظر ہے جس سے یہ نظر مانوس ہے

اپنے گرد و پیش سے باہر نکل سکتا نہیں

حال کے زنداں میں کب سے آدمی محبوس ہے

لمحہ لمحہ بے خیالی میں بہی جاتی ہے عمر

روز و شب کا سلسلہ اک سیلِ نامحسوس ہے

جسم کی دیوار کا سایہ گراں ہے روح پر

روشنی اس شمع کی آزردۂ فانوس ہے

مصلحت کی چار دیواری سے رہیئے دور دور

اہلِ دل کے حق میں اس گھر کی فضا منحوس ہے

دیکھ کر اپنا ہی سایہ لوگ ڈر جاتے ہیں کیوں

جو ڈراتا ہے انہیں کس خوف کا کابوس ہے

بن سنور کر خلوتِ احساس سے نکلا یہ کون

زیبِ تن الفاظ کا کتنا حسیں ملبوس ہے

یہ دمِ فکرِ سخن گُل کاریٔ نوکِ قلم

صفحۂ قرطاس ہم رنگِ پرِ طاؤس ہے

زندگی کے سامنے مخمورؔ پھیلاؤ نہ ہاتھ

زندگی سے کیا ملے گا زندگی کنجوس ہے