عشق میں اس سے کروں گا جسے اردو آئے

زخم سے پھول اُگے پھول سے خوشبو آئے

تجھ سے وہ بات کرے جس کو یہ جادو آئے

تیرے ہونٹوں پہ کسی اور کی باتیں آئیں

میری آنکھوں میں کسی اور کے آنسو آئے

اتنا آسان نہیں ملّاح کا بیٹا ہونا

نائو ڈوبی تو میرے ہاتھ میں چپّو آئے

یہ جو ہر پھول کی مٹھی سے نکل جاتی ہے

عین ممکن ہے کبھی یہ میرے قابو آئے

اس نے مجھ میں گلِ امید کھلا رکھا ہے

تاکہ مجھ سے نہ کسی اور کی خوشبو آئے

چاند چہرے مجھے اچھے تو بہت لگتے ہیں

عشق میں اس سے کروں گا جسے اردو آئے