حمدنعتغزلنظمقطعاتترانےمناجاتبزم مزاحگیت
فہرست ردیف
منتخب کلام کی ردیف کے آخری حرف کی ترتیب پر فہرست

غمِ سود و زیاں سے بے نیازانہ نکلتا ہے

غزل| مہندرسنگھ بیدی سحرؔ انتخاب| بزم سخن

غمِ سود و زیاں سے بے نیازانہ نکلتا ہے
بڑی فرزانگی سے تیرا دیوانہ نکلتا ہے
سنائیں حالِ دل کس کو کریں کس پر بھروسا ہم
جسے اپنا سمجھتے ہیں وہ بیگانہ نکلتا ہے
طوافِ شمع سے جزم مرگ کچھ حاصل نہیں پھر بھی
نہ جانے کیا امیدیں لے کے پروانہ نکلتا ہے
ہماری بزمِ مے نوشاں میں رات آتی نہیں واعظ
کہ چھپ جاتا ہے جب سورج تو پیمانہ نکلتا ہے
ہمیں سمجھانے والے خود زرا دل چیر کر دیکھیں
درِ کعبہ اگر وا ہو تو بت خانہ نکلتا ہے
جلو میں ساتھ ہوتا ہے ہجومِ حسرت و ارماں
نکلتا ہے ترا عاشق تو شاہانہ نکلتا ہے

سحرؔ سے مت الجھ اے گردشِ دوراں کہ وہ اکثر
تری زد میں بھی آئے تو حریفانہ نکلتا ہے

پچھلا کلام | اگلا کلام

شاعر کا مزید کلام