اے نازشِ کون ومکاں اے نُوریوں کے رازداں

نعت| سمعانؔ خلیفہ انتخاب| بزم سخن

اے نازشِ کون ومکاں اے نُوریوں کے رازداں
اے وجہِ تخلیقِ جہاں اے تاجدارِ اِنس و جاں
سالارِ بزمِ قدسیاں اے شاہِ دینِ مرسلاں
تو ہے شفیعِ عاصیاں جانِ جہانِ بے کساں
تیری زباں میں نورِ حق تیرا بیاں معمورِ حق
تیری صدا منشورِ حق سچائیوں کے ترجماں
تیری نوائے دلبری تیری ادائے عاشقی
تعمیرِ ہستی کے لیے کردار تیرا جاوداں
تو منتہائے جستجو تو ہی کمالِ آرزو
تجھ سے نشاطِ رنگ و بو اے شمعِ قلبِ عاشقاں
تجھ سے گلوں کا بانکپن تو ہے چمن کی آبرو
میں ہوں غبارِ رہ گزر تو ہے امیرِ کارواں
تیری ضیائے خُلق سے بزمِ جہاں کی دل کشی
روشن ترے انوار سے قلب و نظر کی کہکشاں
اقبالِ حق کو دیکھ کر شاہوں کے سر بھی جھک گئے
آزر کدوں میں گونجتی ہے اب تلک تیری اذاں
موجِ طرب کے جوش میں اِس بزمِ ناؤ نوش میں
آنکھیں ہیں تیری منتظر غارِ حرا کے میہماں
ذوقِ مئے افرنگ میں شوقِ طلب بھی کھو گیا
بے تابیاں ہوں پھر عطا دل کو ملیں سرمستیاں
ترسے ہوئے دیدار کو با چشمِ تر ہم آئے ہیں
اک التفاتِ ناز بس اے بے کَسوں کے مہرباں

بن کر گدائے بے نوا سمعانؔ ہے در پر پڑا
ہر دم ہے مصروفِ ثنا اس کا قلم اس کی زباں


پچھلا کلام | اگلا کلام

شاعر کا مزید کلام